Она, она ва яна ОНА (ҳадис ва қисса)
(1)
Абу Ҳурайра розияллоҳу анҳудан ривоят:
جاء رجلٌ إلى رسولِ اللهِ صلى الله عليه وسلم فقال: يا رسولَ اللهِ، من أحقُّ الناسِ بحُسنِ صَحابتي؟ قال: أُمُّك. قال: ثم من؟ قال: ثم أُمُّك. قال: ثم من؟ قال: ثم أُمُّك. قال: ثم من؟ قال: ثم أبوك.
رواه البخاري ومسلم وغيرهما
Расулуллоҳ соллаллоҳу алайҳи ва саллам ҳузурларига бир киши келиб қуйидаги савол билан мурожаат қилди:
Эй Расулуллоҳ, менинг гўзал ҳамроҳлигимга (яъни, яхши муомалам билан бирга яшаб ва хизматида бўлиб юришимга) энг ҳақли инсон ким?
Расулуллоҳ соллаллоҳу алайҳи ва саллам жавоб бердилар:
«ОНАНГ (энг ҳақли инсон)»
У киши яна сўради: Кейинчи?
Расулуллоҳ яна жавоб бердилар:
«Сўнг яна ОНАНГ!»
У киши яна сўради: Кейинчи?
Расулуллоҳ яна жавоб бердилар:
«Сўнг яна ОНАНГ!»
У киши яна сўради: Кейинчи?
Расулуллоҳ жавоб бердилар:
«Кейин ОТАНГ!»
(Бухорий, Муслим ва бошқа муҳаддислар ривоят қилишган)
(2)
Анас ибн Молик розияллоҳу анҳудан ривоят:
أُمُّ حارثَةَ بنِ سُراقَةَ، أتتِ النبي صلَّى اللهُ عليه وسلَّم فقالتْ : يا نَبيَّ اللَّهِ، ألا تُحدِّثُني عن حارثَةَ_ وكان قُتِلَ يومَ بَدرٍ، أصابَهُ سهمٌ غَرْبٌ_ فإن كان في الجنةِ صَبَرتُ، وإنْ كان غيرَ ذلك، اجتَهَدتُ عليهِ في البُكاءِ ؟ قال : «يا أُمَّ حارثَةَ إنها جِنانٌ في الجنَّةِ، وإنَّ ابنَكِ أصابَ الفِردَوسَ الأعْلَى» .
رواه البخاري والترمذي وغيرهما
Бадр ғазотида дайди ўқ тегиб ҳалок бўлган Ҳориса ибн Суроқа розияллоҳу анҳунинг онаси Рубаййиъ розияллоҳу анҳо Расулуллоҳ соллаллоҳу алайҳи ва саллам ҳузурларига келиб шундай мурожаат қилди:
Эй Аллоҳнинг пайғамбари! Менга Ҳориса ҳақида хабар берасизми? Агар у жаннатда бўлса сабр қиламан. Аммо дўзахга тушадиган бўлса бор кучим билан (дод-вой қилиб) йиғлайман!
Расулуллоҳ соллаллоҳу алайҳи ва саллам жавоб бердилар:
«Эй Умму Ҳориса! Жаннатда (бир эмас, сон-саноқсиз) жаннатлар бор! Сенинг ўғлинг Фирдавси аъло (Энг олий даражадаги жаннат – Фирдавс жаннати)га кўтарилди!».
(Бухорий ва Термизий ривоятлари)
•┈┈┈┈┈┈•✿❁✿•┈┈┈┈┈┈•